د خطر ځای دا دی چې موږ دا پوښتنه له مخکې نه د یوې سطحي (یا نیمګړې) ځواب سره کوو. “البته، پولوس یا بل چا دا تحریف کړی”، موږ ژر تر ژره ځواب ورکوو پرته له دې چې ژور فکر وکړو، ځکه دا هماغه څه دي چې موږ یې اورېدلي دي. یا بیا فکر کوو، “البته نه! دا خو بېمعنا خبره ده”، بیا هم پرته له دې چې واقعاً پوه شو، یوازې ځکه چې موږ ته همداسې ښوول شوي دي. دا د ټولو هغو خلکو لپاره خطر دی چې د مقدسو کتابونو په اړه پوښتنې کوي. موږ دا پوښتنه ژر تر ژره ردوو (ځکه چې همداسې موږ ته ذهنیت ورکړل شوی)، یا دا چې له پوښتنې تېرېږو. نو راځئ چې دا موضوع په دقت سره وڅیړو.
د انجیل نوی عهد لیکوالان پرته له پولوس نه
راځئ چې له پولوس پرته نورو لیکوالانو څخه پیل وکړو. دا د عیسیٰ علیه السلام حواریون ـ یعنې د هغه نږدې ملګري وو. دوی به د هغه پیروي کوله، خبرې یې اورېدلې، او ورسره یې بحثونه کول. دوی به دا هم کتلي چې عیسیٰ علیه السلام څه ویل او څه کول، هم په خصوصي توګه او هم په عام محضر کې. ځینې، لکه یحیی، متی، او پطرس، د هغه له ۱۲ نږدې حواریونو څخه وو. دوی د نوی عهد له کتابونو څخه اته ولیکل. نور، لکه مرقس، د هغه د پراخې دایرې له پیروانو څخه وو. پاتې لیکوالان (د پولوس پرته) د هغه ورونه یعقوب او یهودا وو. هغوی له عیسیٰ علیه السلام سره یوځای لوی شوي وو. یعقوب د عیسیٰ علیه السلام له دنیا نه د تللو وروسته د اورشلیم (بیت المقدس) د حواریونو مشر شو.
د عیسوي زېږد له لومړۍ پېړۍ څخه د یهودانو تاریخي لیکنې واقعاً د یعقوب یادونه کوي. په هماغه پېړۍ کې یو ستر یهودي پوځي تاریخلیکوال، یوسفیوس (Josephus)، ژوند کاوه چې څو تاریخي کتابونه یې لیکلي دي. په خپلو کتابونو کې، هغه د ۶۲م میلادي کال پېښې ـ چې د عیسیٰ علیه السلام له دنیا نه د تللو ۳۲ کاله وروسته وې ـ بیان کړي دي، چې پکې یې لیکلي چې یهودي قوم یعقوب، چې د عیسیٰ ورور و، شهید کړ. دا وګورئ چې هغه دا پیښه څنګه بیان کړې ده:
حنانیا (چې لوی کاهن و) بېصبره و او د صدوقيانو پیروي یې کوله، کوم چې د قضاوت پر مهال بېرحمه وي. حنانیا فکر کاوه چې کله چې فېستوس مړ شوی او البینوس لا نه و رسېدلی، نو هغه به دا فرصت ولري. نو د سانهدیرین (د یهودي مشرانو شورا) قاضیان یې راوغوښتل او د یعقوب په نوم یو سړی، چې د هغه عیسی ورور و چې مسیح بلل شوی و، او ځینې نور یې ورسره راوستل. هغوی یې په دې تورن کړل چې د شریعت خلاف ورزي یې کړې او د سنګسار حکم یې ورکړ.”(یوسفیوس، ۹۳ میلادي، تاریخي آثار، جلد شلم، بند ۱۹۷)
یوسفیوس تشریح کوي چې په ۶۲ میلادي کال کې، د روم واکمنو حاکمانو حنانیا د بیتالمقدس لوی کاهن وټاکه. ورپسې سیاسي ګډوډي رامنځته شوه. حنانیا له دې فرصته استفاده وکړه او یعقوب یې د مرګ په سزا محکوم کړ. د هغه پلار (چې هغه هم حنانیا نومېده) شاوخوا دېرش کاله مخکې عیسی علیه السلام ته د اعدام حکم ورکړی و. د حنانیا زوی هم ژر دا موقع وموندله چې له یعقوب سره ورته کار وکړي. له همدې امله، یعقوب د خپل ورور عیسی مسیح علیه السلام د پیروانو د مشر په توګه د کلونو خدمت له امله هدف وګرځېد.
قرآن د عیسی علیه السلام د دغو حواریونو (یا پیروانو) په اړه څه وايي؟
دا سړي د انجیل نوی عهد (د پولوس د لیکنو پ) کتابونه لیکلي دي. د دې قضاوت لپاره چې آیا دوی انجیل تحریف کړی که نه، موږ کولای شو لومړی د قرآن نظر ته رجوع وکړو. لاندې آیت وګورئ:
۵۲ نو عیسٰی چې كله له دوى څخه كفر ولیده، نو ويې ويل: د الله په طرف (تللو كې) څوك زما مددكوونكي دي؟ حواریانو وویل: مونږ د الله مددګار یو، مونږ په الله ایمان راوړى دى او ته ګواه شه په دې چې بېشكه مونږ مسلمانان (فرمانبردار) یو. ۵۳ اى زمونږه ربه! مونږ ایمان راوړى دى په هغه څه چې تا نازل كړي دي او مونږ د رسول تابعداري كړې ده، نو ته مونږه له ګواهي كوونكو (د حق) سره ولیكه. (سوره ۳ آل عمران: آیت ۵۲-۵۳)
او كله چې مونږه حواریانو ته الهام وكړ چې په ما او زما په رسول ایمان راوړئ، هغوى وویل: مونږ ایمان راوړى دى او ته په دې ګواه شه چې یقینًا مونږ مسلمانان یو (سوره ۵ ماعده: آیت ۱۱۱)
دا آيتونه موږ ته په ښکاره توګه وایي چې د عیسی مسیح علیه السلام حواریون:
۱. د عیسی المسیح مرسته کوونکي،
۲. د الله مرسته کوونکي،
۳. او د الله له خوا الهام شوي وو چې په عیسی المسیح ایمان راوړي.
په دې حواریونو کې متی، پطرس، او یحیی شامل دي. هغوی د نوی عهدنامې اته کتابونه لیکلي، چې له هغو څخه دوه انجیلونه دي (د متی او یحیی انجیلونه). او مارک، چې د پراخ حلقې شاگرد و، درېیم انجیل ولیکه. که څوک پر قرآن ایمان لري، نو باید د دغو حواریونو لیکنې هم ومني. دا لیکوالان هېڅکله نشي کولای چې انجیل یې تحریف کړی وي. کله چې موږ لیکل شوي انجیلونه لولو، نو دا د هغو حواریونو لیکنې دي چې قرآن یې تصدیق کوي. پولوس هېڅ انجیل نه دی لیکلی، بلکې هغه یوازې مقدس لیکونه لیکلي دي.
نو موږ وینو چې که له غیر مذهبي تاریخي سرچینو څخه وي او که له قرآنه، دواړه د داسې منطقي دلایلو ملاتړ کوي چې د انجیل نوي عهد هغه کتابونه ومنل شي چې د پولوس نه دي.
د عیسی علیهالسلام شاهدی: تورات او زبور د لومړنیو معیارونو حیثیت لري
خو د عیسی علیهالسلام په اړه څه؟ هغه موږ ته د کوم شهادت(شاهدی) منلو توصیه کړې؟ پام وکړئ چې هغه چیرې د خپل ځان او خپل پیغام لپاره پر صحیح او نه خراب شوي شاهد تاکید کوي.
عیسی هغوی ته وویل: «تاسو څومره ناپوهه یئ او د پیغمبرانو د ویناوو په منلو کې زړه نازړه یئ. ۲۶ ایا دا ضروري نه وه چې مسیح دا کړاوونه وویني او بیا دې خپل جلال ته ورسیږي؟» ۲۷ بیا عیسی د موسی د تورات څخه نیولې د ټولو پیغمبرانو تر لیکنو پورې چې د خدای په کلام کې خپله د هغه په هکله لیکل شوي وو، هغوی ته بیان کړل. (لوقا فصل ۲۴:آیت ۲۵-۲۷)
۴۴ بیا عیسی هغوی ته وویل: «دا زما هغه خبرې دي چې کله زه ستاسو سره وم او تاسو ته به مې ویل چې هغه څه چې د موسی په تورات، د پیغمبرانو په لیکنو او د زبور په کتاب کې زما په هکله لیکل شوي دي، باید رښتیا شي.» ۴۵ بیا یې د هغوی ذهنونه روښانه کړل، ترڅو د خدای په کلام پوه شي. (لوقا فصل ۲۴: آیت ۴۴-۴۵)
۴۶ که چېرې تاسو په موسی باندې ایمان درلودلی، نو په ما باندې به مو هم ایمان درلود، ځکه چې هغه زما په هکله لیکلي دي. ۴۷ خو که چېرې تاسو د هغه په لیکنې باندې ایمان نه لرئ، نو زما په خبرو باندې به څنګه باور وکړئ؟» (یوحنی فصل ۵: آیت ۴۶-۴۷)
عیسی علیهالسلام خپله د موسیٰ (تورات) ته، بیا پیغمبرانو او زبورو (زبور) ته اشاره کوي ترڅو د مسیح رول تشریح کړي. همدا وجه ده چې موږ له تورات نه پیل کوو. د آدم، قابیل او هابیل، نوح، لوط، او ابراهیم (۱، ۲، او ۳) نښانې ټول آیتونه د تورات او قرآن څخه اخیستل شوي دي.
که موږ له تورات څخه پیل وکړو، نو په خوندي لاره کې پاتې کېږو – ځکه عیسی علیهالسلام پخپله موږ ته دا ویلي دي. دلته موږ هغه نښې زده کوو چې د انجیل راز به را څرګند کړي. بیا به موږ دا زده کړې د عیسی علیهالسلام د وروڼو او شاګردانو له لیکنو سره پرتله کړو.
د پولوس (پاول) په پام کې نیولو سره
نو د پولوس لیکنې څه ډول دي؟ موږ باید د هغه په اړه څه فکر وکړو؟ کله چې موږ د تورات او زبور مطالعه وکړو او هغه نښې زده کړو چې الله (ج) خامخا موږ ته را استولي دي، او بیا د عیسی (ع) د حواریونو او وروڼو کتابونه هم مطالعه کړو، نو موږ به دومره پوهه ترلاسه کړې وي چې که موږ د پولوس لیکنو ته مخه کړو، وکولای شو چې پوه شو آیا هغه څه چې هغه لیکلي دي د هغو شیانو سره توپیر لري که نه کوم چې موږ مخکې زده کړي دي. که موږ دا شالیدي معلومات د هغو ‘محفوظو کتابونو’ نه ولرو، نو دا به ناشونې وي چې پوه شو پولوس لیکلي څه فاسد شوي دي که نه. نو ځکه، که غواړو چې خپل لټون خوندي وساتو، نو موږ به له پولوس نه پیل نهکړو، ځکه د هغه اعتبار بېسواله نه دی.
خو عیسیٰ مسیح (ع) پولوس ته ظاهر شو او هغه ته یې دنده ورکړه چې غیر یهودانو ته انجیل تشریح کړي. دا کیسه دلته بیان شوې ده. په هغه وخت کې، ټول غیر یهودان بتپرستان وو. نو پولوس انجیل داسې بیان کړ لکه څنګه چې نورو حواریونو نه و کړی. نورو حواریونو، لکه پطروس، ومنله چې د هغه لیکنې پوهېدل سخت دي، خو بیا هم هغوی ته مقدس کتاب ویل شوي دي. پطروس وایي:
۱۵ زمونږ د څښتن صبر یو خلاصون وګڼئ، لکه څنګه چې زمونږ ګران ورور پولوس هم د هغه حکمت له مخې چې خدای ورته ورکړی دی تاسو ته لیکلي دي. ۱۶ هغه په خپلو ټولو لیکونو کې د دې شیانو په هکله خبرې کوي. په هغو کې ځینې داسې خبرې شته چې پوهېدل ورباندې ګران دي او ناپوهه او بدلېدونکي خلک هغه د پیغمبرانو د نورو لیکنو په شان غلط تعبیروي، نو هغوی په خپلو ځانونو باندې تباهي راولي. (د پطروس رسول دوهم لیک دریم فصل: آیت ۱۵-۱۶)
له هغه څه نه پیل کوو چې موږ پوهېږو چې تحریف شوی نه دی
پولوس د انجیل پیغام نه دی بدل کړی او نه یې تحریف کړی. د هغه لیکنې منل شوې دي. خو د اختلافاتو د مخنیوي لپاره، موږ له هغو لیکنو څخه پیل کوو چې پرې هېڅ شخړه نشته (تورات او زبور). وروسته له هغه، موږ څلور انجیلونه تعقیبوو، کوم چې د عیسی مسیح (علیه السلام) ملګرو لیکلي دي. موږ له دې کتابونو څخه ډېر څه زده کولی شو، نو زموږ د هدف لپاره د پولوس لیکنو ته اړتیا نه لرو.